TVRI YOGYAKARTA NEWS–WIDI- GIMIN YUDHA
Pamirsa, kajawi kangge ngraketaken raos pasedherekan, mliginipun masyarakat jawi dehaharan kupat mekaten gadhah makna filosofi ingkang inggil.
Ketupat utawi kupat mekaten mboten saged kapisahaken kaliyan ingkang naminipun dinten bakda riyadi. Mliginipun masyarakat jawi kupat mekaten gadhah makna filosofis ingkang inggil, mboten namung mujudaken setunggaling daharan kemawon. Kajawi maknaning tembung, sarta cakrikipun, proses utawi titi laksananing ndamel kupat mekaten ugi gadhah makna ing pagesanganipun masyarakat jawi. Kupat saking tembung jarwa dhosok ingkang maknanipun amengku kalepatan, sok sintena ingkang dhahar kupat mekaten ing pangangkah sagedto merdika saking sedaya kalepatan lan warga msyarakat sami nglebur dosa kanthi tansah apura ing ngapuran ing antawispun sesami. Kupat ugi gadhah makna laku papat inggih menika lebaran, luberan, leburan sarta laburan. Lebaran maknanipun korining pangapunten ingkang tinarbuka wiyar dhumateng sedaya kalepatan. Luberan maknanipun mbludag utawi luber inggih menika paring sedekah dhumateng tiyang ingkang mbetahaken . Leburan tegesipun nglebur dosa ingkang sampun dipun lampahi sadangunipun setunggal tahun, sawetawis laburan inggih menika nyuckekaken diri, saengga dados pethak kadosdene jabang bayi. Kupat ugi mralambangaken setunggaling kasampurnan. Bab menika gayut kaliyan kemenanganipun umat muslim sasampunipun nindaken siyam ing wulan suci ramadhan sadangunipun tigang dasa dinten.
