TVRI YOGYAKARTA NEWS-HENDRY SAPUTRA-ABDUL R
Setunggaling taneman ingkang kebak mupangat lan asring dipun dadosaken minangka taneman pager wonten ing lahan pesabinan inggih menika taneman kelor.
Taneman kelor mujudaken satunggaling tetuwuhan saking suku moringaceae, ingkang inggilipun saged ngantos sewelas meter. Ronipun bunder alit, saged dipun mangsak dados janganan menapadene kangge jamu, perangan taneman kelor inggih menika ron, uwit, woh lan wijinipun mupangati menggahing badan. Kelor ngandhut nutrisi ingkang dipun betahaken dening badan, ing antawisipun asam amino, vitamin, kalium, protein lan zat besi. Kajawi dipun dhahar nalika tasih teles, kelor ugi saged dipun garingaken, kadadosaken glepung, manut panaliten, kandhutan kelor teles lan garing menika beda-beda, kelor teles ngandhut vitamin c lipet kaping pitu kapandhinagken jeram, vitamin a lipet kaping sekawan kapandhingaken wortel, lan kalium lipet kaping tiga saking pisang. Wondene kelor ingkang sampun garing langkung inggil malih bentenipun. Wonteni ng lahan pesabinan gesik ing pesisir bantul, taneman menika kathah dipun tanem dening kadang tani minangka kangge taneman pager. Padatanipun dipun tanem wonten ing pinggir sabin menapadene ing tapel wates sabin setunggal lan sanesipun. Taneman keloringkang dipun tanem wonten ing pesisir menika kanyata ugi ketingal subur.
