TVRI YOGYAKARTA NEWS-ADI NUGROHO-WENDY WICAKSONO
Kathah tiyang ingkang tasih rumaos gojag-gajeg anggenipun mupangataken kebon suwung. Salah setungaling cara murakabi ingkang saged dipun tindhaken inggih menika kangge budidaya sengon laut ingkang dumugi wedal sakmenika tasih fadah pengajeng ajeng sae.
Kajeng sengon mujudaken salah satunggaling bahan baken kangge ndamel dlancang. Gilir gumantosing wekdal panyuwuanan peken saya tikel, saengga nanem wit sengon menika kadhah kalodhangan peken ingkang sae. Sengon saged tuwuh ing sedaya jinis pasiten, inggih menika jinis wedi, menapadene lempung saged tuwuh ing laladan andhap utawi inggil, nanem sengon mekaten mboten mbetahaken pangrimatan ingkang mirunggan, kepara dipun kendgelaken mekaten kemawon saged tuwuh subur. Ananging supados tuwuhipun langkung sae , saderengipun winih dipun tanem, langkung rumiyin kedah dipun damel luwangan ingkang dipun isi rabuk kandhang lan kapur tohor. Tebihipun tanem ing antawisipun wit udakawis setunggal engga setunggal setengah meter. Supados tuwuhipun cepet, saben kalih minggu dipun tambahi rabuk NPK setunggal sendok. Rabuk wau dipun cuweraken langkung rumiyin mawi toya, udawis setunggal gelas plastik toya mineral, nembe dipun siramaken . Rabuk kandhang dipun tambahaken saben setengah tahun sepisan. Sawetawis ama ingkang kedah dipun waspadani inggih menika uler lan grendhel. Taneman sengon menika sampun saged dipun tegor umur gangsal engga nem tahun kanthi diameter kawan dasa engga seket sentimeter. Saben setunggal wit sengon dipun sade kanthi regi pitung atus seket ewu dumugi setunggal yuta kalih atus seket ewu rupiyah. Menawi dipun etang kangge tumbas winih saben setunggal wit kalih ewu gangsal atus, rabukipun kalih atus ewu rupiyah, mila kanthi regi pitung atus ewu kemawon kadang tani sampun pikantuk bathi saben witipun gangsal atus ewu rupiyah.
