TVRI YOGYAKARTA NEWS-MARGOLARAS
Pamirsa, paguyuban sopir gerobak lembu guyup rukun bantul tasih krenteg anggenipun ngupadi nglestantunaken warisan transportasi tradisional gerobak lembu. Salah setunggalipun kanthi ngawontenaken syawalan lan festival gerobag sapi, ing kampung pancasila ngireng ireng Sidomulyo Bambanglipuro Bantul.
Festival gerobak lembu ingkang dipun wontenaken ing kampung pancasila ngireng ireng Sidomulyo Bambanglipuro Bantul, ngiras pantes kangge adicara syawalan lan pepanggihan para anggota komunitas bajingan utawi sopir gerobag lembu ing bantul. Kejawi meniko, kangge nepangaken malih transportasi tradisional warisan leluhur dumateng warga masyarakat ngireng ireng, utaminipun para lare. Sebab miturut ketua paguyuban gerobag lembu guyup rukun bantul isdiyono, ampun kedadosan lare lare alit jaman sak meniko mboten tepang utawi mboten mangertosi bilih wontenipun transportasi tradisonal gerobag lembu meniko. Isdiyono mratelakaken bilih sak meniko anggota paguyuban gerobag lembu guyup rukun bantul cacahipun wonten sewidak anggota, sedanten tasih krenteg nguri guri wontenipun gerobag lembu meniko. Adicara festival gerobag lembu meniko ugi kangge ngrumaketaken sesami anggota paguyuban, lan negesaken malih niatipun bade nglestantunaken warisan budaya leluhur. Warga masyarakat ugi saget kalipur, kepara saget nderek numpak gerobag lembu mlampah mlampah mudeng desa.
Kaeiring wekdal mlampahipun jaman, nggadahi lan ngrimat gerobag lembu meniko kejawi pancen kangge klangenan, ugi saget dipun ngupangataken kangge srana pados ulu wedal kanthi ndadosaken gerobag lembu wisata. Kadosta ingkang sampun mlampah ing njodog pandak bantul, warga masyarakat utawi pelancong saget ngraosaken numpak gerobag lembu kanthi mbayar ongkos jasanipun. Penumpang dipun jak mlampah mubeng desa, ngraosaken numpak gerobag lembu sinambi nyawang swasana ndesa.
