TVRI YOGYAKARTA NEWS-HENDRY SAPUTRA-ABDUL ROHIM
Rabuk kandang mujudaken setunggaling perangan wigati menggahing kadang tani. Salah setunggaling mupangatipun inggih menika saged ndamel struktur tanah dados sae, nikelaken unsur hara makro lan mikro saengga saged ndamel tuwuhing taneman dados sae.
Kathah warga pesisir ingkang sampun mupangataken lahan pesisir kangge nindakaen manekawerni budidaya olah tetanen ingkang kanyata asilipun ugi maremaken. Ananging gandeng kaliyan lahan ingkang wonten ing pesisir ingkang ngandhet pasir utawi wedi mila kedah dipun suburaken rumiyin. Salah setunggalipun inggih menika migunaaken rabuk kandhang. Ing wekdal sakmenika kathah kadang tani pesisir ingkang mupangatakan bucalan saking mendha, menapadene bucalan saking ayam.
Sakderengipun dipun ginaaken kangge ngrabuk, bucalan menika kedah dipun fermentasi rumiyin utawi dipun garingaken, awit menawi langsung dipun ginaaken saged ndayani taneman menika pejah amargi hawa saking bucalan ingkang benter. Bucalan menika wau lajeng dipun campur wonten ing bedengan ingkang sampun dipun siyapaken lajeng mangkeh dipun campur. Sawetawis kangge kabetahan toyanipun, kadang tani kathah ingkang sampun mupangataken sumur bor ingkang ngginaaken listrik. Kanthi cara ngolah lahan menika mila asiling budidaya taneman olah tetanen saged sae kangge nambah wulu wetu keluwarga.
