TVRI YOGYAKARTA NEWS-WIDI-HARIF YUDA
Para pamirsa, salah setunggaling kupiya ingkang saged katindaken kangge njagi karesikaning lingkungan saking limbah balegriya inggih menika lumantar budidaya maggot, skala balegriya.
Limbah balegriya menawi dipun bucal mekaten kemawon ing lingkungan, ndamel lingkungan dados reget sarta nuwuhaken polusi. Salah setunggaling kupiya, njagi resiking lingkungan kados ingkang katindaken dening guwo sari training centre utawi GSTC ingkang dumunung ing laladan Guwosari, Pajangan, Bantul ingkang ngemonah uwuh bale griya kangge budidaya maggot. Piranti ingkang dipun ginaken namung prasaja saget, inggih menika ngginaken kalih ember tilasing wadhah cet ingkang dipun tumpuk, menggah caranipun, ember ingkang ngandhap dipun bolong lan dipun pasangi kran kangge mbucal lindi utawi limbah cuweripun.
Ing pinggiraning ember ingkang nginggil dipun sukani bolongan alit cacah kalih engga sekawan ingkang mupangatipun kangge niganipun laler BSF. Neni widuri ketua GSTC atur panyaruwe bolongfan langkung sae menawi kalih iji kemawon, jalaran menawi kekathahen saged kangge nigan laler ijo. Sasampunipun piranti cumawis, limbah balegriya dipun lebetaken ing ember perangan nginggil. Padatanipun sasampunipun tigang dintenan sampun narik laler cemeng utawi BSF. Kajawi limbah balegriya, piranti menika ugi saged dipun lebetaken pampres lare, ingkang caranipun ugi sami kadosdene limbah bale griya, neni widuri nambhaken bilih lindi utawi limbah cair ingkang dipun asilaken saged dipun mupangataken kangge ngrabuk taneman, mekaten ugi remah tilasing limbah. Sawetawis maggot ingkang dipun asilaken saged kangge pakan ulam, iwen, peksi lan sakpiturutipun.
