TVRI YOGYAKARTA NEWS – MARGOLARAS
Pamirsa, pengetan dinten lahir pancasila dados tanda gregeting warga ing Padukuhan Kanutan Sumberulyo Bambanglipuro Bantul, kangge njagi lan nglestantunaken budaya lan pancasila ing tengahing masyarakat, kagelar adicara merti wayang beber pancasila kanthi lakon anoman obong.
Adicara merti wayang beber pancasila ingkang dipun wontenaken pengelola museum wayang beber sekartaji ing Padukuhan Kanutan Sumberulyo Bambanglipuro Bantul, menika kangge mengeti dinten lahiripun pancasila dasar bangsa indonesia. Padukuhan kanutan ingkang kasebat ugi kampung pancasila, tansah njunjung inggil bhineka tunggal ika kangge guyub rukunipun warga. Kangge ngregengaken adicara merti wayang beber pancasila meniko, dipun wontenaken pentas seni reog wayang, salah satunggal seni budaya saking bantul ingkang tasih dipun remeni warga masyarakat, mliginipun warga ing Padukuhan Kanutan Sumberulyo Bambanglipuro Bantul. Kesenian reog wayang sejatosipun dados salah setunggal banda banduning budaya bangsa, ingkang sak menika tasih dipun lestantunaken. Reog wayang menika jinis kesenian beksan ingkang dipun paragaaken langkung saking kalih dasanan paraga beksan, ingkang sedayanipun ngagem kostum wayang wong miturut tokoh wayang piyambak piyambak. Ing pambukaning beksan sedanten paraga beksan sesarengan , dipun lajengangaken peperangan. Karana kathahipun paraga menika, gelar reog wayang dados tontonan ingkang narik kawigatposan, lan saget nglipur masyarakat. Beksan reog wayang menika mujudaken warisan budaya tak benda ngayogyakarta, ingkang nggadahi makna sejarah lan filosofi. Saben setunggal babak pementasan, wonten lakon beksan ingkang dipun paraga miturut caritanipun.
Nguningani cacahipun paraga beksan kathah, gelar reog wayang menika mbetahaken papan ingkang radi wiyar. Kesenian menika tasih dipun remeni masyarakat saking lare lare dugi tiyang sepuh, kedah dipun ginelar ing papan ingkang langkung jembar. Wontenipun pentas reog wayang lakon anoman obong menika, saestu dados setunggal adicara budaya ingkang saget ngguyubaken warga masyarakat ing padukuhan kanutan. Kanyata warga masyarakat mirsani pentas reog wayang menika ngantos purna, mlampah kanthi tertib lan aman saha rumaos bingah.
