TVRI YOGYAKARTA NEWS – MARGOLARAS
Pamirsa, kangge ngawekani regi pakan ingkang mboten ajeg, kadang tani ulam ing Bantul, ngginakaken sistem oksigen tebar padat toya cethek ing saklebeting budidaya ulam lele.
Daru kisworo salah setunggaling kadang tani ulam lele saking dusun watu panjangrejo pundong bantul mratelakaken , bilih sakmenika piyambakipun nembe nyobi budidaya lele sistem oksigen tebar padat toya cethek. Benten kalian sistem kocor, kanthi sistem oksigen tebar padat toya cethek meniko, toya kolam mboten dipun bucal. Ananging dipun puter ngangge sistem sirkulator ingkang dipun damel saking toples bahan plastik. Tujuwanipun inggih meniko supados toya kasebat tambahan oksigen ingkang sampun lebur ing toya, lan mlebet malih ing kolam. Kanthi sirkulasi meniko endapan pakan saget tumut muter malih. Daru kisworo nambahaken, kajawi sistem sirkulasi oksigen, ing kolamipun ugi dipun terapaken sistem formula pakan, ingkang dipun damel saking cairan formula sinbiotik, tetes tebu lan toya, dipun campuraken pelet. Sak sampunipun dipun campur, lajeng dipun fermentasi rumiyin sak dangunipun sekawan likur jam, sak derengipun siyaga kangge pakan ulam. Setunggal liter cairan forumula mekaten saget kangge campuran gangsal kilo pelet. Miturut hasil paneliten, setunggal butir pelet hasil fermentasi meniko kandetan gizinipun ami kalian pelet biasa ukuran setunggal sendok.
Amargi ngginakaken pakan saking formula campuran lan fermentasi meniko kandetan gizinupun langkung inggil, pramila kabetahan pakan langkung ngirit engga seket persen. Kajawi ngirit pakan, lumantar sistem sirkulasi oksigen meniko gunggung lele ingkang dipun tebar langkung katah. Saengga pangajabibun kanthi sistem menika asil panen ulam lele saget langkung katah, wusananipun saget ningkataken karaharjaning kulawarga. Mekaten margolaras saking bantul caos palapuran.
