TVRI YOGYAKARTA NEWS – SETYA BUDI
Kadang tani kacang brol ing laladan Jeruk Wudel kapanewon Girisubo Gunungkidul kedah nemahi gagal panen amargi taneman kacangipun mboten saget tuwuh kanthi sae awit winatesing toya irigasi. Katah saking asil panen kacang brol gadahanipun kadang tani ingkang kopong.
Kadang tani ing laladan kalurahan Jeruk Wudel kapanewon Girisubo Gunungkidul namung saget pasrah awit kawontenan olah tetanen kacang brol ingkang dipun tindakaken mboten saget tuwuh kanthio sae. Taneman kacang brol gadahanipun kadang tani sami garing awit winatesing toya irigasi, menapa malih sampun sawetawis minggu pungkasan menika jawah mboten mandhap ing laladan menika. Salah saweneh kadang tani ari wijayanto ngandaraken, ing mangsa tanem palawija tahun menika, taneman kacang brol gadahanipun dipun pestekaken gagal panen. taneman kacang ingkang umuripun sampun 70 dinten menika sami garing, lan menawi dipun panen kacangipun sami kopong. Kepara katah saking taneman kacang brol ipun ingkang mboten ngasilaken kacang lan namung oyot kemawon. Awit saking kawontenan menika piyambakipun kedah nemahi kapitunan engga 3 yuta rupiyah. Piyambakipun lan kadang tani ing kacang brol sanesipun namung bade mupangataken rendengngipun kangge pakan raja kaya.
Tahun menika dados tahun ingkang awrat piyambak tumrap kadang tani ing laladan kalurahan jeruk wudel, amargi kawontenan cuaca ingkang mboten saget dipun dugi benten kaliyan ing tahun sakderengipun.
