TVRI YOGYAKARTA NEWS – SETYA BUDI
Salah saweneh pengrajin kajeng ing laladan Kapanewon Saptosari Gunungkidul ndamel kerajinan gerobak bakso lan bakwan kawi. Lenggananipun mboten namung saking laladan Gunungkidul kemawon, nanging ugi saking Jawa Tengah.
Gerobak bakso lan bakwan kawi menika mujudaken asil karyanipun pelaku ukm saking kalurahan krambil sawit Kapanewon Saptosari Gunungkidul. Bowo Aryanto minangka pengrajin gerobak bakso menika ngandaraken, bilih mila bikanipun piyambakipun bikak usaha ndamel kerajinan gerobak bakso lan bakwan kawi menika awit katah saking warga ing laldanipun ingkang sami sadeyan bakso lan bakwan kawi ing kitha ngayogyakarta, kepara wonten ing jawa tengah. Para bakul menika sami pesen gerobak bakso ing papanipun. Lan gilir gumantosing wekdal saya katah para bakul ingkang sami pesen gerobak ing papanipun menika. Menawi kawontenanipun nembe regeng, ing saklebeting setunggal wulan piyambakipun ingkang dipun biyantu dinig para pedamelipun, saget ndamel gerobak bakso lan gerobak bakwan kawi ngancik 30 iji. Pesenan gerobak menika katah – katahipun dipun kintun ing laladan jawa tengah wiwit saking kudus, jepara, salatiga, kebumen, engga purwokerto. Kangge asil ingkang maremaken, piyambakipun ginakaken kajeng akasia mahoni engga kajeng jatos kangge bahan bakenipun.
Setunggal gerobak bakso lan gerobag bakwan kawi menika dipun sade wiwit saking setungal yuta kalihatus engga setunggal yuta nem atus ewu rupiyah saben ijinipun, gumantung ukuranipun.
