TVRI YOGYAKARTA NEWS – ADI – WENDY
Tumpangsari mekaten mujudaken setunggaling cara ingkang sae kangge nikelaken asiling panen saking kalih jinis komoditas pertanian wonten ing setunggaling lahan. Kathah komoditas pertanian ingkang saged dipun tanem kanthi cara tumpangsari menika. Salah setunggalipun inggih menika taneman janganan arupi kangkung oyot lan sawi bakso, ing pangangkah samangkenipun sasampunipun setunggaling taneman sampun mboten produktif, taneman sanesipun taksih produktif, saengga asilipun saged tikel. Taneman kangkung oyot lan sawi bakso menika dipun pilih amargi taksih nggadahi pangajeng-ajeng ingkang sae, sanadyan ing wekdal sakmenika pangrimatanipun kedah langkung setiti awit taksih mlebet ing mangsa pancaroba. Kawuningana toya jawah menapa dene embun asrep menika saged ndayani sawetawis taneman janganan katerak ama lan sesakit, kosok wangsulipun mangsa ketiga ingkag kirang toya ugi nuwuhaken perkawis piyambak, menapa malih taneman janganan ingkang saged kadayan ama sesakit ing perangan ron menapadene oyotipun, mila pancen diupun betahaklen cara ngrimat ingkang sarwa kaukur lan timbang. Sawetawis kangge taneman sawi menika ama ingkang kedah dipun waspadani inggih menika kutu daun. Kutu daun menika saged ndayani perangan ron dados kriting lan saged ndadosaken perangan ron menika risak. Kangge ngawekani ama menika ing perangan lahanipun saged dipun pasang mulsa plastik, bab menika dipun tindaaken amargi kutu daun jinis menika mboten remen dening cumloroting sunaring surya. Nanging kathah kadnag tani ingkang mboten ngginaaken mulsa jalaran kapetang awis lan nambahi awrat beya produksi. Kejawi menika ugi saged dipun semprot mawi insektisida. Bab sanes ingkang kedah dipun gatosaken inggih menika bilih taneman sawi mbetahaken ph antawisipun 5.5 dumugi 7. Menawi siti ingkang badhe dipun tanemi sawi mboten ngandut takeran ph kasebat saged dipun tambahi kapur pertanian ingkang nggadahi fungsi kangge netralaken ph siti.
