TVRI YOGYAKARTA NEWS – WIDI – HARIF YUDA
Sumber daya alam Ngayogyakarta kanyata mangaribawani tumprap asil karya seni. Sinaosa seni wau karipto saking pirantos ingkang sarwa prasaja lan lampahing karya ingkang winates, ananging asilipun mujudaken setunggaling karya seni ingkang gadhah bobot filosofis inggil, salah setunggalipun inggih menika batik.
Batik tulis mujudaken setunggaling karya ingkang kathah diasilaken dening para perajin batik lan sampun dipun mangertosi dening warga masyarakat ing Indonesia menapaden mancanegari. Ing sawetawi laladan kathah dipun panggihaken punjering kerajinan batik ingkang gadhah ciri mirunggan piyambak-piyambak, sae menika rerengganipun engga werninipun. Salah setunggaling laladan ing ngayogyakarta ingkang gadhah bathik mirunggan ingkang tetep njagi tradisi inggih menika ing laladan segajih, hargotirto, kokap Kulon Progo. Usaha kerajinan batik menika dipun awiti dening saeneh wiranem inggih menika ali subkhan, wiwit tahun kalih ewu sangalas kapengker. Duk rikala semanten piyambakipun ningali kawontenan bilih nalika dumados pageblug Covid sembilan belas, mangaribawani sepening jujugan wisata ingkang dipun kemonah inggih menika segajih “Life and Education”. Adedasar kawontenan ingkang mekaten menika, piyambakipun gadhah penggalihan kadospundi supados tetep pikantuk asil ing sak tengahing pageblug, saengga saking penggalihanipun piyambakipun angripto batik. Motif batik ingkang dipun damnel inggih menika cakrik kontemporer, saengga kathah dipun remeni wiwit saking lare engga tiyang sepuh. Dening Ali Subhkan batik asiling cipta rasa lan karsanipun meniak dipun sukani nama, batik sundul langit. Asilipun kanyata maremaken, sinaosa dumados pageblug, kanyata asiling kerajinan batik menika laris lan kathah pesenan. Mboten namung ing laladan DIY kemawon, batik menika kanyata dipun kintun dumugi saindenging nuswantra. Jalaran sipatipun kontemporer lan mboten gumathok kaliyan pakem, para lenggananipun saged pesen, cakrik gambaripun. Asiling kerajinan batik menika dipun kerta aji wiwit saking satus seket ewu dumugi kalih atus ewu rupiyah. Ing sak tengahing saya ngrebasaning cita motif batik piyambakipun ngajab dhumateng masyarakat supados kersa ngagem busana batik ingkang asli. Kanthi ngginaken batik ingkang asli mekaten, kaangkah ugi saya nikelaken rahatrjaning kadang pengrajin.
