TVRI YOGYAKARTA NEWS – HENDRY – ABDUL ROHIM
Ngajengi mangsa ketiga menika mujudaken wekdal ingkang trep kangge nindaaken budidaya taneman sata. Salah setunggalipun kados ingkang dipun tindaaken warga Pleret Bantul menika.
Kawontenan hawa ingkang benter nanging ugi lembab sarta siti ingkang garing menapa dene toya ingkang cepet sanget asat nalika dipun siramaken ing siti, kanyata ugi nuwuhaken kawontenan ingkang benten-benten, inggih bab menika ingkang kedah dipun waspadani dening para kadang tani sata. Mboten saged dipun selaki, tanamem sata ingkang pengaos ronipun awis menika kanyata pancen mujudaken taneman ingkang ringkih sanget katerak manekawerni sesakit, saya malih nguningani kawontenan cuwaca ingkang dereng saged dipun dugi kados wedal samenka. Salah setunggalipun damel taneman sata ingkang dipun budidaya dening warga Pleret Bantul sami lajeng dados mboten sami tuwuhipun. Wonten ingkang ronipun ketingal ageng lan subur nanging wonten ugi ronipun dados alit-alit sarta blegeripun ugi mboten saged inggil. Salah saweneh kadang tani sata mratelaaken, menawi tahun kapengker ron sata menika saged wiyar, tahun menika dipun ajab ugi mboten kawon bobot saenipun. Dipun betahaken pangrimtan ingkang langkung setiti supados ron sata menika saged dipun panen lan mboten nuwuhaken kapitunan, caranipun munthesi sekar sata kanti pangajab pupus ron sata utawi misri ingkang reginipun awis menika mboten kekirangan zat nikotin jalaran zat menika kelangkung kathah mlebet ing perangan sekaripun. Saged kawuningan, raosipun sata saking laladan plered menika sampun kawentar minangka sata ingkang bobotipun sae. Sata plered asring dipun dadoskaken campuran sata saking laladan sanes jalaran kandetan nikotinipun langkung inggil. Mila reginipun ugi sae sanget ing pekenan. Kejawi perkawis taneman sata ingkang kunthing menapaden lanas sakwanci wanci amargi kenging jawah, kadang tani sata ugi kedah waspada wontenipun ama ingkang ngrebasa taneman sata ing mangsa ketiga menika, kadosta uler, walang ijem, sarta wereng.
