TVRI YOGYAKARTA NEWS – MARGOLARAS
Ngobong damen sisa panenan pantun dugi sak meniko tasih dipun praktekaken sakperang kadang tani bantul. Sanadyan wonten dampak polusi saking kebulipun, nanging miturut kadang tani ngobong damen meniko nggadahi kesaenan antawisipun kangge reresik lan kangge rabuk saking awunipun.
Wanci panen pantun ing pundi papan ke mawon dipun pesthekkaken nilaraken damen utawi sisa taneman pantun ing sabin, menopo meniko panen kanthi cara modern ngangge mesin, utawi cara tradisional. Kathah sithikipun damen gumantung wiyaripun lahan tetanen. Damen meniko wonten ingkang dipun pendhet kangge pakan lembu, namung menawi mboten gadah lembu kalian kadang tanui namung ditilarke mawon ing sabin. Ngengingi sabin bade kangge tanem malih, kadang tani kedah nyediakaken cara kangge ngolah lahanipun. Salah setunggal cara ingkang tasih dipun lampahi sakperang kadang tani njih meniko ngobong damen, dipun pangajab samangke awunipun saget kangge rabuk ngiras pantas reresik pesabinan. Ing Bantul ngobong damen meniko tasih dipun lampahi kadang tani ing sak perang papan pesabinan, sanadyan mboten sedanten kadang tani. Miturut salah seunggal kadang tani, damen ingkang sampun garing dipun lempakaken ing sabin utawi ing pinggiran sabin lajeng dipun obong. Sanadyan wonten dampak polusi saking kebulipun, nanging miturut kadang tani cara meniko saget upangatipun.
Miturut kadang tani, sak sampuniun panen pantun damen kedah dipun singkiraken utawi dipun obong menawi bade tanem malih. Cara ngobong damen meniko langkung gampil lan cepet, lan enggal enggal sedya olah lahan malih. Nanging ing sak perang papan pesabinan sanesipun, praktek ngobong damen meniko sampun mboten dilampahi malih kalian kadang tani. Sebab kejawi nyebabaken polusi, ugi dereng temtu awu damen meniko saestu sae kangge siti sabin.
