TVRI YOGYAKARTA NEWS – MARGOLARAS
Sakperan kadang tani ing pesisir lahan gesik Sanden Bantul sampun sakwentawis ngginakaken teknologi siram taneman ngangge sprinkel, ngupangaten jaringan energi listrik pln ingkang mlebet ing lahan tetanen. Siram taneman mawi teknologi sprinkel kejawi nggampilaken kadang tani anggenipun olah tetanen, ugi ngirit tenaga, lan biaya.
Wiwit saking kalih tahunan kepengker sak sampunipun wonten program listrik mlebet ing lahan tetanen pesisir bantul, para kadang tani penggarap lahan gesik sanden bantul wiwit ngraosaken manfaat energi listrik kangge olah tetanen. Salah setunggalipun kangge srana siram taneman, ingkang sampun dados pakaryan pokok saben dintenipun kangge para kadang tani. Alih teknologi saking siram taneman cara kocor ngangge mesin kompa bensin, sak meniko sampun gantos ngangge mesin kompa listrik. Sakperang kadang tani ugi enggal enggal nggantos teknologi siram mawi sistem kocor, dados teknologi sprinkel. Miturut kadang tani, menawi ngangge teknologi sprinkel sakderengipun kedah ndamel jaringanipun ing lahan, sahingga mbetahaken modal tambahan antawisipun gangsal yutanan kangge lahan wiyaripun antawis sewu meter persegi. Sanadyan mekaten tetep dipun lampahi kadang tani, ngengingi teknologi sprinkel meniko kathah ngupangataken kangge kadang tani piyambak. Kadosta nggampilaken anggenipun olah tetanen utaminipun rikala siram taneman, ngirit tenaga lan biaya karana ngginakaken sumber energi listrik.
Kanthi ngupangataken energi listrik meniko, kadang tani saget inovasi anggenipun siram tanemanipun ngangge model sprinkel utawi irigasi kabut. Namung mekaten mboten sedanten kadang tani ngginakaken model meniko, tasih kathah ingkang remen ngginakaken model kocor. olah tetanen cara modern meniko kanyata ngremenaken kathah kadang tani, karana mboten ndamel kesel badan. Ing laladan pesisir lahan gesik sak meniko nembe mlebet mongso tanem brambet, para kadang tani nyediakaken lahanipun.
