TVRI YOGYAKARTA NEWS – HENRY SAPUTRA – HARIF YUDA
Supados pikantuk asil ingkang maremaken, salah saweneh kadang tani ternak lembu poang ing Sleman ngginaken cara budidaya ingkang mirunggan.
Sugiyarto warga saking Dukuh, Tri Harjo Sleman sampun nindaken usaha budidaya lembu poang wiwit tigang dasa tahun kapengker lan engga sepriki tsih lumampah kanthi sae. Ing salebeting nindaken usaha menika pahit getir, sampun dipun temahi dening sugiyarta. Rikala semanten gungguning lembu ingkang dipun ingah ngancik pitung dasanan babonan. Ananging jumbuh kaliyan prenatan lan kawontenan peken, usaha budidaya lembu poang ugi nemahi perkawis ingkang ndamel kadang tani kirang pikantuk bebathen jalaran pengaosing susu ingkang andhap saengga mboten saged kangge nutup beya produksi. Ngawekani kawontenan ingkang mekaten menika saklajengipun sugiyarto gadhah cara ingkang mirunggan supados usaha budidaya lembu poang menika tetep dados cagaking gesang. Cara ingkang katindaken inggih menika lembu poang sasampunipun manak mboten dipun peres susunipun, ananging sugiyarta tumbas pedhet umur setunggal wulanan ing peken. pedhet wau sak lajengipun dipun susokaken dhateng babonan wau. Sasampunipun sekawan wulan pedhet wau sampun saged dipun sade. Sugiyarto paring conto, pedhet jaler umur sewulan samenika pengaosipun antawisipun sekawan engga gangsal yuta. Sasampunipun dipun susokaken sadangunipun udakawis sekawan wulan pengaosing pedhet wau sampun ngancik sedasanan yuta. Kanthi mekaten ing sadangunipun tigang wulan sugiyarto pikantuk bebathen gangsal yutanan. Setunggal pedhet sampun paring bebathen gansgal yutanan, menawi gadhah sedasanan babonan temtunipun bebbathenipun langkung saya kathah. Menika dereng saking anakan pedhet ingkang dipun lairaken saking babonan wau. sewalikipun menawi pengaosing susu nembe sae sugiyarto nembe meres susuning lembu poangipun, lan dipun sade ing peken. Ing salebeting nindak-aken usaha pancen dipun betahaken setunggaling seni lan kedah pinter-pinter ningali kawontenan peken.
