TVRI YOGYAKARTA NEWS – WIDIYANTA
Kangge ngirangi uwuh sterofoam, saweneh warga, Baturetno, mupangataken kangge olah tetanen, nanem kangkung ing sak nginggiling blumbang ulam.
Sterofoam tilas wadah barang elektronik mbetahaken wekdal atusan tahun supados saged bosok utawi terurai. Menawi dipun bucal ing pekawisan temtu kemawon badhe njalari risaking lingkungan mliginipun pasiten. Nguningani kawontenan ingkang mekaten menika, Ari saweneh warga saking Pelem Lor, Baturetno Banguntapan, Bantul, saklajengipun mupangataken stereofoam wau kangge nindaken olah tetanen aqua phonik ing blumbang ulam. Sterofoam menika dipun dadosaken papan kangge madhahi gelas plastik tilas toya mineral ingkang mujudaken media kangge nanem kangkung. Cara mupangataken stereofoam menika ugi namung gampil, stereofom dipun bolongi kanthi ukuran udakawis gangsal sentimeter, cacahing bolongan gumantung kaliyan ageng aliting sterofoam. Sawetawis gelas tilasing toya mineral dipun sukani media tanem saking pakis menapadene siti, ananging saderengipun ing dasar lan pinggiranipun dipun bolong mawi paku. Bolongan menika kangge mlebeting toya ingkang dipun betahaken kangge tuwuhing kangkung. Saklajengipun gelas plastik wau dipun lebetaken ing bolongan sterofoam. Taneman kangkung menika sampun saged dipun panen sasampunipun selikur dinten. Lumantar cara olah tetanen aquaphonik menika ari mboten kedah ngrabuk taneman kangkungipun, jalaran sampun pikantuk rabuk saking bucalan ulam menapadene sisa-sisa pakan ulam arupi pelet. Asiling olah tetanen menika asilipun lankung resik lan saras jalaran mboten kenging siti. Streofoam menika saged dipun ginaken ambal kaping puluhan, saengga mboten nuwuhaken perkawis ing lingkungan.
