TVRI YOGYAKARTA NEWS – ADI NUGROHO – WENDY
Tumrapipun para sutresna ulam hias, ngingah ulam hias toya tawar ing aquarium mekaten karaos ngremenaken. Endahing ulam toya tawar menika kanyata ugi mboten kawon kaliyan ulam seganten.
Kapandingaken kaliyan ulam seganten, ulam hias toya tawar pancen kawon gunggung lan jinisipun. Nanging menawi dipun tingali kanti permati setungal mbaka setunggal, endahing ulam hias mboten kawon kaliyan ulam toya seganten. Kepara ulam hias toya tawar saking negari-negari tinemtu menika ugi ketingal langkung nyleneh, lan eksotis. Agus, salah saweneh juragan ulam hias toya tawar ing jombor sleman njlentrehaken, saben tahun gunggung panyuwunan ulam hias toya tawar saya tikel. Semanten ugi jinis ulam hias ingkang dipun remeni warga masyarakat saben tahun ugi ewah, gumantung kaliyan jinis ingkang saweg dipun dadosaken tren ing kalanganing para sutresna ulam hias ing kitha-kitha ageng. Agus ugi waleh, ngingah ulam paes mekaten langkung mirah lan gampil kapandingaken kaliyan ulam hias seganten. Jinis ulam ingkang saged dipun dadosaken klangenan ugi kapetang pepak, wiwit saking piranha saking amazon, baracuda toya tawar, ulam buntal, lele lopard, welut geni, arwana dumugi ulam alit-alit ingkang werninipun nengsemaken. Miturut agus, kunci kasilipun ngingah ulam hias toya tawar ing akuarium gumantung kaliyan saenipun toya, resikipun aquariium sarta pakan ingkang leres. Menawi wonten ulam ingkang sakit prayoginipun enggal dipun pisahaken supados mboten nular dumateng ulam sanesipun. Ulam hias toya tawar menika dipun sade kanti regi beda-beda gumantung kaliyan ukuran, jinis lan langkanipun ulam. Limrahipun saking regi setunggal ewu rupiah kangge jinis seklit dumugi tiga setengah yuta rupiah kangge jinis arwana super red.
