TVRI YOGYAKARTA NEWS – HENDRY SAPUTRA – HARIF YUDA
Saking sakathahing jinis taneman pasren ingkang wonten ing pekenan, taneman brokoli mujudaken steunggaling taneman ingkang nggadahi werni endah lan saged dipun dadosaken taneman kangge pager.
Kados mekaten menika wujudipun taneman brokoli. ing pekenan taneman brokoli menika wonten ingkang werninipun ijem lan kuning utawi jene. Taneman brokoli ingkang jene mujudaken jinis ingkang laris amargi wenrinipun ingkang benten kaliyan ron taneman pasren saneispun menawi dipun tanem wonten ing taman. Roffi setunggaling bakul taneman pasren ing laladan brengosna mlati sleman ngandaraken bilih kathah langgananipun ingkang mundhut taneman menika minangka kangge jejangkeping taman amargi werninipun ingkang endah. Langkung tandes piyambakipun ngandaraken bilih setunggaling bab ingkang kedah kagatosaken inggih nalika ing taneman brokoli menika wonten benalu utawi kemladean-nipun ingkang awujud bakmi-bakmian. kados naminipun kemladean menika wujudipun kados bakmi. Ananging menawi dipun kendelaken kemawon saged ndayani taneman brokoli dados risak. Menawi dipun prangguli wontenipun bakmi-bakmian menika kedah enggal-enggal dipun icali. Taneman menika ugi kapetang gampil anggenipun ngrimat ingkang baken kabetahan toya mboten kekirangan. Taneman menika ugi kedah dipun kemonah kanthi ngethok perangan ron-nipun supados ketingal sae. Anggenipun ngethok ugi dipun jumbuhaken kaliyan kekajenganipun piyambak-piyambak, menapa malih menawi taneman menika dipun tanem minangka kangge pager griya. Kathah warga masyarakat ingkang langkung remen dateng taneman brokoli ingkang werni jene amargi werninipun ingkang benten kaliyan werni ron padatanipun. Nalika dipun tanem ing pekawisan utawi ing taman, taneman brokoli jene saged dados setunggaling kawigatosan.
