TVRI YOGYAKARTA NEWS – HENDRY SAPUTRA – ROCHIM
Kangge nikelaken produktifitas bayem bubut, saweneh kadang tani ing Dusun Majegan Pendowoharjo Sleman nanem bayem wonten ing setunggaling kubung ingkang kanyata asilipun sae kapandingaken ing lahan konvensional.
Kados mekaten menika kebon bayem ingkang dipun budidaya dening nono, saweneh kadang tani ing laladan dusun majegan pendowoharjo sleman. jinising bayem ingkang dipun budidaya inggih menika bayem bubut. Anggenipun nanem bayem menika katindaaken wonten ing steunggaling kubung utawi greenhouse. Piyambakipun ngandaraken bilih bab menika katindaaken kangge nikelaken asili produksi bayem. Piyambakipun blaka bilih taneman janganan kadosta bayem menika langkung prayogi dipun tanem wonten ing lahan ingkang mboten kenging sunaring surya kanthi langsung amargi saged ndamel perangan ronipun risak. Mila kubung utawi greenhouse menika mujudaken steunggaling cara kangge ngawekani bab menika. anggenipun ndamel kubung menika pancen mboten mirah, watawis 25 yuta rupiah. Ananging mawi kubung menika saged nikelaken asil produksi bayem ingkang dipun tanem. Sekawit piyambakipun namung ngginaaken kubung saking bahand eling namung kemawon mboten awet. Pangrimatan ingkang mboten njlimet dados setunggaling pawadan mbudidaya taneman menika langkung murakabi. Benten kaliyan bayem pethik ingkang anggenipun nanem cekap dipun pethik lan saged thukul malih, bayem bubut menika anggenipun panen dipun bubut sak oyotipun. Menawi kapandingaken kaliyan taneman janganan saneispun, pengaosipun bayem ing pekenan kapetang ajeng. Perangan ron-ipun ugi nggadahi werni ijem ingkang seger lan pang-ipun mboten atos. Setunggaling bab wigati ingkang kedah dipun gatosaken mboten sanes kabetahan toya kedah cekap ampun ngantos kekathahen. Menawi kekathahen toya saged njalari perangan ronipun risak katerak ama menapadene sesakit. Setunggal iket ron bayem menika dipun kerta aji 2 ewu rupiah nalika ing mangsa ketiga, ananging mlebet ing mangsa rendheng setunggal iketipun namung dipun kerta aji setunggal ewu rupiah amargi kathah ingkang nanem. Asiling budidaya bayem menika lajeng dipun sade wonten ing wande-wande ing sakiwa tengenipun papan menika.
