TVRI YOGYAKARTA NEWS – WIDI
Pageblug Covid-19 mboten ngirangaken gregeting warga masyarakat kangge olah tetanen. Bab wau kabukti saking kridhaning warga masyarakat ing brontokusuman, kamentren mergangsan ingkang saged mujudaken wontenipun ruang terbuka hijau publik.
Manunggalaken wontenipun pekawisan, ruang terbuka hijau perkotan lan kalodhangan ekonomi kreatif ing satengahing pageblug covid sembilan belas, penyuluh pertanian lan penggerak swadaya masyarakat kemantren mergangsan, tansah paring pangampingan dhumateng sedaya kelompok tani ingkang wonten ing satengahing masyarakat. Kawicaksanan kasebat pikantuk kawigatosan ageng saking masyarakat piyambak, kacihna inggiling greget masyarakat anggenipun nindaken olah tetanen ing sak tengahing pageblug Covid-19. Salah setunggalipun inggih menika mupangataken setunggaling pekawisan ingkang dumunung ing sak celak-ing kalurahan brontokusuman. Ing pekawisan menika dipun tanemi sekar telang, dening warga. Menawi sekawit sekar telang ingkang dipun tanem kirang pangrimatanipun, ananging sasampunipun pikantuk pangampingan saking penyuluh pertanian lan penggerak swadaya masyarakat, saklajengipun dipun gulawenthah kanthi estu, saengga kawontenanipun dados asri lan edi peni. Gilir gumantposing wekdal, mboten namung sekar telang ingkang dipun tanem ing papan menika, ananging ugi manekaweri taneman janganan, taneman obat lan taneman pasren sanesipun. Kajawi menika ugi dipun jangkepi manekawerni srana dolanan lare, gasep, sarta mergi ingkang dipun pasangi konblok. Kawontenaning lingkungan lahan ingkang sakmenika dados endah, wusananipun dipun mupangtaken dening warga masyrakat ing sakiwatenganipun kangge ngenggar-enggar penggalaih lan saged dados ruang terbuka hijau publik. Ing tembe ngajengipun papan menika badhe dipun dadosaken kebun wisata edukasi agro ingkang ugi dipun maunggalaken kaliyan program sekolah adiwiyata, saengga para siswa saged tepang lan nresnani lingkunagnipun. Mboten namung menika kebon kembang telang menika samangkenipun ugi badhe salah setunggaling lumbung pangan mataraman ing wewengkon kalurhan brontokusuman, kamentren mergangsan kitha ngayogyakrta.
