TVRI YOGYAKARTA NEWS – ADI NUGROHO – WENDY WICAKSONO
Menggahing sutresna ulam hias, ulam predator mujudaken salah setunggaling jinis ulam ingkang kathah dipun remeni. Pengaosipun awis, ingkang kelas pasanggiri dipun aosi saben setunggal senti panjangagipun kanthi regi setunggal yuta rupiah .
Ulam kuthuk utawi gabus minangka salah setunggalipun ulam hias wekdal sakmenika tansaya moncer. Kathahipun sutresna ulam predator jinis menika saya njembaraken pekenan. bab menika kados ingkang dipun raosaken dening dimas setunggaling bakul ulam hias ing laladan Dusun Pakisaji, Candibinangun, Pakem, Sleman. Sampun watawis kalih tahun menika piyambakipun nyade ulam predator, salah steunggalipun inggih menika ulam gabus. Ulam gabus menika nggadahi manekawerni jinis ingkang kasebar ing sedaya laladan ing indonesia, kepara wonten ugi ingkang saking negari India, Tiongkok lan laladan Asia Tenggara sanesipun. Ing wekdal sakmenika piyambakipun nggadahi manekawerni jinis ulam gabus mboten namung saking indonesia kemawon ananging ugi saking manca negari. Ulam predator menika dipun sade wiwit saking 25 ewu rupiah dumugi 35 yuta rupiah gumantung kaliyan jinisipun. Ingkang pengaosipun awis menika radin-radin mujudaken ulam ingkang sasab saking pasanggiri. Budidaya ulam menika kalebet gampil, ingkang baken inggih kedah njagi kawontenan toyanipun resik. Menawi mboten resik, zat amoniak ingkang wonten ing sisa pakan menika badhe njalari ulam gabus katerak sesakit jamur. Menawi mboten enggal-enggal dipun usadani ulam ingkang katerak jamur menika saged pejah. Supados mboten nular dateng ulam sanesipun, menawi wonten ulam ingkang katerak sesakit menika kedah dipun pisahaken lan dipun karantina kalih dinten mboten dipun sukani pakan. Sakdangunipun kalih dinten wau ulam menika dipun usadani. Kejawi nyudiyaaken ulam jinis predator, ing kiosipun menika piyambakipun ugi nyade manekawerni jinis ulam hias sanesipun.
