TVRI YOGYAKARTA NEWS – SETYA BUDI
Pagelaran ringgit wacucal sedalu natas dados tontonan wajib saben tahun ing saklebeting upacara tradisi rasulan lebar damen ingkang dipun gelar dining warga ing Kalurahan Kepek Kapanewon Saptosari Gunungkidul.
Rasulan lebar damen mujudaken acara tradisi ingkang dipun tindakaken saben tahun ingkang dipun gelar sak sampunipun panen raya. Manekawerni krida lan pasugatan dipun segahaken ing tradisi menika. Pagelaran ringgit wacucal sedalu natas dados tontonan ingkang dipun antu – antu dining warga masyarakat. Kados pagelaran ringgit wacucal ingkang dipun gelar ing kalurahan kepek saptosari gunungkidul menika. Atusan warga wiwit saking para lare, wiranem engga tiyang sepuh sami mirsani pagelaran ringgit wacucal ingkang dipun gelar ing kantor kalurahan kepek. Lurah kepek suhut hudi ngandaraken, bilih pagelaran ringgit wacucal sedalu natas menika kajawi minangka tontonan tumrap warga masyarakat, ugi mujudaken raos syukur warga lan kadang tani ing laladan kepek saptosari menika, awit asil panen pantun ingkang maremaken, lan mujudaken kupiya kangge tumut nglestantunaken budaya jawi ingkang adiluhung. Ing pagelaran ringgit mneika mundut lakon tumurune Wahyu Sri sedono kanthi Dalang Ki Margiyo ingkang mujudaken dalang saking laladan Gunungkidul.
Kajawi upacara tradisi rosulan, warga ing laladan emnika ugi ajeg ngadani upacara tradisi lelabuh ingkang dipun gelar ngajengi mangsa tanem.
