TVRI YOGYAKARTA NEWS – JATMIKO HADI
Ing malem setunggal suro kala wingi, warga bendungan lor wates Kabupaten Kulonprogo, nindakaken lampah bisu ngupengi padusunan. Krida menika kangge mahargya datengipun warsa enggal Islam 1 Muharram 1446 Hijriyah.
Dasanan warga pedukuhan bendungan lor, Kalurahan Bendungan, Kapanewon Wates, Kabupaten Kulonprogo, wiwit para lare, dumugi tiyang sepuh gelar ritual tradisi laku bisu kangge mahargya warsa enggal islam utawi ingkang asring dipun sebat wulan suro, ingkang tebihipun ngancik 5 kilometer. Kados naminipun, ing ritual menika warga sami mlampah ngupengi padusunan kanthi tapa bisu utawi mboten wawan pangandikan. Para pasarta laku bisu menika namung dipun keparengaken maos shalawat, surat alfatihah lan ayat kursi. Mboten namung menika, ing pojok dusun warga ugi ngumandangaken adzan, kalajengaken munjukaken donga sesarengan ingkang dipun pimpin dining tokoh agami. Ritual menika mujudaken salah setunggaling wujud syukur warga bendungan lor wates Kulonprogo, ingkang sak dangunipun setungal tahun pungkasan menika dusunipun kalisa saking manekawerni bebendu lan bebaya.
Ing pungkasaning tradisi menika, dipun pungkasi kanthi kembul bujono arupi sekul gurih lan gudangan sarta ingkung, kanthi pangajab ing sak dangunipun setunggal tahun mangajen warga tansah pikantuk kanugrahan saking gusti ingkang akarya jagat.
