TVRI YOGYAKARTA NEWS – ADI NUGROHO – WENDY
Kejawi kimpulipun, taneman tales utawi senthe wulung ugi dipun pundhut ron ipun minangka bahan kangge damel buntil. Mila budidaya senthe gadhah kalodangan ingkang sae.
Tales utawi senthe wulung wekdal samenika sampun awis dipun tanem tiyang. Kamangka sejatosipun taneman ingkang gampil sanget dipun rimat menika gadhah bobot ekonomi inggil. Tales wulung asring ugi dipun sebat senthe utawi lompong wulung benten kaliyan taneman lompong ijem ingkang adatipun ugi namung kangge pakan ulam grameh. Dipun sebat wulung jalaran werni taneman menika sarwa wulung wiwit saking cawang ron dumugi kulit kimpulipun. ron senthe wulung ugi langkung alit werninipun ijem sepuh semu abrit. Taneman lompong kathah dipun budidaya kangge ndamel manekawerni dhedhaharan. Ing pekenan lompong wulung sampun angel dipun prangguli.. Kamangko panyuwunan inggil. Ron senthe wulung dipun mupangataken kangge ndamel buntil, setunggaling mangsakan tradisional ingkang sakmenika ugi sampun awis-awis dipun prangguli. Sawetawis kimpulipun kathah dipun mupangataken kangge ndamel roti menapadene kripik. Setunggaling kadang tani ingkang mbudidaya nanem senthe wulung inggih meniko subagyo.. Piyambakipun nanem senthe wulung ing laladan ingkang mapan ing sanden bantul. Sameniko taneman senthe gadhahanipun ngancik umur nem wulanan lan sampun cumawis dipun panen. Senthe wulung kalebet taneman ingkang gampil dipun budidaya lan ugi tahan ing hawa ingkang benter sarta mboten mbetahaken pangrimat ingkang njlimet amargi sipatipun ingkang tuwuh kanti mardika. Ananging menawi dipun tanem kangge dipun sade saenipun inggih dipun rabuk supados panenipun sae. Senthe wulung saget dipun budidaya sae lumantar sekar, wiji menapa bonggolipun. Panyuwunan ingkang inggil lan pasudiyan ingkang sekedhik ndadosaken usaha budidaya taneman lompong wulung nggadhahi pangajeng-ajeng ingkang sae.
