TVRI YOGYAKARTA NEWS – ADI NUGROHO-WENDY
Kathah cara alami kangge saged ngendhaleni ama ing tengahing sabin, salah setunggalipun lumantar taneman corp barrier utawi perangkap ama arupi taneman sekar matahari ingkang dipun dadosaken pager gesang.
Sekar matahari ingkang ukuranipun ageng pancen njarak dipun tanem ing laladan Laguna Glagah Kulonprogo. Tujuwanipun terwaca sanget, kejawi kangge damel endahing lingkungan jalaran sekaripun ingkang ketingal nyolok lan damel sengsem, taneman sekar matahari ingkang celak kaliyan laladan olah tetanen menika kangge ngendaleni ngrebasanipun manekawerni ama, sae menika ama lombok arupi wereng cemeng sarta kutu kebul ingkang wusananipun ugi mbeta virus pathek, jamur lan sapiturutipun. Taneman perangkap utawi ingkang dipun sebat barrier crop menika pancen murakabi sanget. Dipun tingali saking sipatipun ama ingkang remen kaliyan werni sarta gandanipun sekar, dadosaken taneman perangkap menika wusananipun dados jujuganipun manekawerni ama. Ama langkung remen ngrebasa taneman perangkap rumiyin kapandingaken kaliyan ngrebasa taneman utami arupi lombok lan. Saking asil panaliten ingkang dipun tindhaken metaun-tahun, ngendhaleni virus jene, kutu kebul lan sanesipun kanyata pancen murakabi sanget kanti ngginaaken taneman perangkap menika. Kanyata mboten namung saking jinis taneman sekar kemawon, taneman barrier corp menika ugi saged dipun damel saking taneman kacang, buncis menapadene cipir ingkang mupangaatipun kangge ngadhang ngadhangi kutu kebul ingkang sampun wonten virusipun supados mboten menclok ing taneman, amargi langkung rumiyin menclok ing taneman perangkap, saking krida nanem taneman perangkap menika, asil panen kanyata saged tikel ngancik seket persen langkung kapandingakn menawi mboten ngginaken tanemam perangkap.
