TVRI YOGYAKARTA NEWS – SETYA BUDI
Mangsa ketiga ingkang panjang ndamel lahan olah tetanenipun kadang tani ing laladan Kalurahan Wiladeg, Karangmojo, Gunungkidul sami garing lan mboten saget dipun olah lan dipun tanemi. Awit saking kawontenan menika kadang tani namung ngendelaken sabinipun dumugi mangsa rendeng samangke.
Kupiya ingkang dipun tindakaken dining kdang tani ing Kalurahan Wiladeg Gunungkidul supados lahan pesabinanipun saget dipun tanemi muspra, awit mboten wontenipun toya ingkang saget dipun mupangataken kangge irigasi ing sabin. Ing mangsa tanem sakmenika, toya saking umbul banteng sampun mboten nyekapi kangge ngocori lahan pesabinanipun kadang tani. Wusananipun sabin ingkang papanipun tebih saking sumber tota, kawontenanipun garing, lan boten saget dipun tanemi. Sawetawis lahan ingkang sampun dipun tanemi komoditas tetanen ugi nemahi gagal panen amargi taneman mboten saget tuwuh kanthi sae. Suyatno salah saweneh kadang tani ngandaraken, bilih mangsa ketiga tahun menika mujudaken mangsa ketiga ingkang awrat piyambak menggahig kadang tani. Mangsa ketiga ndamel lahan pesabinanipun kadang tani garing lan sitinipun dados atos, saengga katah blahan ingkang dipun beraaken kemawon. Amargi menawi dipun tanemi kadang tani bade nemahi kapitunan ingkang langkung ageng.
Kawontenan ingkang benten dumados ing lahan pesabinan ingkang mapan ing sak celaking sumber toya banteng. Lahan olah tetanenipun kadang tani ing papan menika ketingal tuwuh kanthi sae, sinaosa pasudiyan toya irigasi ui winates.
