TVRI YOGYAKARTA NEWS – JATIMKO HADI
Ing mangsa tanem menika, sawetawis kadang tani brambet ing laladan Kabupaten Kulonprogo langkung milih winih saking laladan Nganjuk Jawa Timur, amargi dipun pitados gadahi kualitas ingkang langkung sae kabandingaken winih brambet lokal.
Mlebet ing mangsa tanem ingkang kaping tiga menika, kadang tani brambet ing laladan Kabupaten Kulonprogo sami nanem winih brambet jinis thailand saking laladan Nganjuk Jawa Timur. Salah saweneh kadang tani brambet saking laladan Demangrejo Sentiolo Kulonprogo Tukimin ngandaraken, bilih ing mangsa tanem menika, winih brambet ingkang dipun tanem ing laladan menika ngancik 10 ton. Piyambakipun lan kadang tani brambet ing laladan menika langkung milih winih brambet jinis thailan saking Nganjuk Jawa Timur, amargi gadahi sawetawis kalangkungan kabandingaken winih brambet lokal. Salah setunggalipun inggih menika tahan saking manekawerni ama lan sesakit. Ing lahan sewu meter persagi, kabetahan winih brambet ing laldan menika rading – rading ngancik 1 kwintal, lan sekedhikipun piyambakipun mbetahaken 3 setengah kwintal winih brambet ingkang dipun tanem ing lahanipun kanthi wiyah 4 ewu meter persagi.
Tukimin nelakaken bilih pengaosing winih brambet ing mangsa tanem sakmenika langklung mirah kabandingaken mangsa tanem sakderengipun, inggih menika 33 dumugi 35 ewu saben kilonipun. Kamangka ing mangsa tanem sakderengipun pengaosing winih brambet ngancik 60 ewu rupiyah saben kilonipun.
