TVRI YOGYAKARTA NEWS – WIDIYANTA
Para pamirsa, salah setunggaling jinis iwen ingkang saged dipun mupangataken kangge njagi ketahanan pangan mliginipun daging inggih menika ayam kalkun.
Dumugining wekdal samenika warga masyarakat ingkang ngingah ayam kalkun namung dipun dadosaken iwen klangenan kemawon jalaran wulunipun ingkang sae lan bleger badanipun nyleneh. Kamangka sakjatosipun, ayam kalkun menika ugi saged dipun pendhet dagingipun, ayam kalkun jaler dewasa awratpun saged ngancik gangsal welas kilogram. Kajawi raos dagingipun langkung keset, saking asiling panaliten daging ayam kalkun menika kalebet andhap kandhutan kolestrolipun. Salah saweneh pambudidaya ayam kalkun saking Turi Sleman HY Mujiono ngandhraken bilih budidaya ayam kalkun gadhah pangajeng-ajeng ingkang sae jalaran panyuwunan peken tasih inggil. Dereng ngantos dewasa ayam kalkun sampun telas dipun pendhet bakul saking peken ngasem menapadene saking muntilan magelang. Pengaosing daging kalkun setunggal kilogram samenika ngancik seket gangsal ewu rupiyah. Kalkun kalebet tahan saking maneka werni sesakit. Ing salebeting buididaya kalkun perkawis pakan ugi kalebet gampil inggih menika dedak utawi katul ingkang kacampur jagung kanthi perbandingan tiga bandhing setunggal. Kajawi menika supados ayamipun saras kedah dipun sukani pakan ijeman arupi ron janganan menapadene suket . Kalkun gampil ngrembakanipun, menawi nigan saged ngancik kalih dasanan iji. Ing salebeting nindaaken budidaya ayam kalkun menika kalebet gampil saged dipun umbar mekaten kemawon ananging langkung sae menawi dipun damelaken kandhang ingkang permanen.
