TVRI YOGYAKARTA NEWS – HENDRY SAPUTRA-HARIF YUDHA
Dumugi wedal menika, budidaya cacing sutera tasih dados kalodhangan usaha ingkang sae. Panyuwunan peken ingkang kathah lan regi cacing sutra ugi kapetang inggil.
Cacing sutra ingkang wonten ing Padusunan Kruwet, Sumber Agung, Moyudan, Sleman, dados sumbering wulu wedal ingkang mikolehi. Menawi dipun tingali , cacing sutra menika wujudipun alit lan lembut sanget kados kain sutera. Pancen leres, cacing werni abrit menika mboten namung dados pakan ulam kemawon, nanging ugi saged ndatengaken rejeki piyambak tumrap ingkang budidaya, setungal liter cacing sutra ing pekenan dipun aosi 35 ewu dumugi 40 ewu. Nanging wonten ing mriki cacing sutra dipun aosi namung 25 ewunan. Cacing menika ugi dipun budidaya lan dados samben warga ing sakiwa tengenipun laladan menika. Winarsih, salah saweneh tani ternak cacing sutera nyariosaken, bilih cacing menika, ngandhet protein inggil sanget kangge pakan bibit utawi winih ulam ingkang nembe kemawon netes, menapa dene ingkang umuran etangan dinten. Emanipun, jalaran gumantung sanget kaliyan mangsa, mila pasudiyan cacing sutera alam ugi lajeng mboten saged ajeg. Kamangka kabetahan cacing sutera menika saben dintenipun kathah sanget. Ing laladan kruwet piyambak, panyuwunan mboten tau suda, kepara kadang tani kadangkala nyuda panyuwunan para konsumen, amargi cacing ingkang wonten kadang winates. Cacing sutera menika , dening para kadang tani ternak dipun mekaranen ing blumbang sabin ingkang wiyaripun gangsal ewunan meter persagi ingkang dipunbage dados blumbang alit., perkawis toya dados kunci kasilipun budidaya cacing sutera, mila, para kadang tani menika mboten wantun ngginakaen toya lepen jalaran sampun kathah kecampur pestisida ingkang saged damel cacing sutera menika pejah.
