TVRI YOGYAKARTA NEWS – JATMIKO HADI
Para pamirsa, Peken Tradisional Wates Kulonprogo sakmenika nembe dipun renovasi utawi dipun rehab, saengga para bakul ing peken menika kapeksa kedah pindah anggenipun gelar daganganipun, ing papan parkir ingkang mapan ing sak wetanipun Peken Wates.
Wiwit purwakaning wulan september kala wingi, dinas perdagangan dan perindustrian Kabupaten Kulonprogo wiwit ngrehab Peken Tradisional Wates Kulonprogo. Rehab dipun tindakaken ing los daging lan ulam ing sisih wetan. Kajawi gantos jobinipun, rehab ughi pdipun tindakaken kanthi nata pipa lan sanitasi ing los menika. Awit saking wontenipun rehab menika, para bakul daging lan ulam, kapeksa kedah pindak anggenipun gelar daganganipu, inggih menika mapan ing papan parkir ingkang wonten ing sisih wetanipun los daging lan ulam. Sinaosa kedah sesadeyan ing papan parkir, annaging para bakul mboten rumaos kuciwa, amargi menapa ingkang dipun tindakaken dining Dinas Perdagangan dan Perindustrian Kulonprogo menika supados kridaning dol tinumbas ing Peken Tradisional Wates Kulonprogo langkung gancar lan tumata. Para bakul namung ngajab renovasi menika saget rampung ing wulan November samangke.
Kawuningana bilih sakderengipun dipun tindakaken renovasi, Peken Tradisional Wates Kulonprogo mliginipun ing los daging lan ulam sabagean papanipun sampun wonten ingkang risak, wiwit saking jobinipun ingkang sami pecah, engga gendengipun ingkang sami bocor.
