TVRI YOGYAKARTA NEWS – ADI NUGROHO-WENDY
Dereng kathah ingkang mangertosi ginanipun taneman rombusa. Sinten ingkang nyana, gulma ingkang kathah tuwuh ing ara-ara menika wohipun kebak mupangat kangge kesarasan.
Kados mekaten menika wujudipun taneman rombusa utawi sentiet. Wohipun pancen ketingal nyleneh. Rombusa ingkag asring dipun sebat woh markisa alas menika pancen ketingal sepele sanget. Nanging sinten ingkang nyana, bilih woh inghkang nalika mateng werninipun malih dados oranye menika gadah kandetan anti oksidan ingkang inggil. Saged kawuningan, nalika tasih nem, woh rombusa menika mboten saged dipun konsumsi jalaran ngandet racun. Nanging jumbuh kaliyan lampahing wedal, sasampunipun rombusa sampun umur lan cumawis dipun panen, racun menika ewah dados zat-zat sanesipun ingkang migunani. Rombusa ingkang sampun mateng kathah dipun sade ing supermarket ageng, kanti regi ingkang ngedhap edhapi, 300.000 rupiah saben kilonipun. Raosipun rombusa mateng ugi meh sami kados markisa. Wujudipun ingkang alit kados ceplukan ugi gadah ganda arum woh markisa. Kandetan vitamin C rombusa ingkang inggil damel taneman menika kathah sanget dipun padosi tiyang nanging emanipun jalaran awis awis ingkang mbudidaya lan naming tuwuh mekaten kemawon ing ara ara, mila pasudiyan ing pekenan ugi winates sanget. Kejawi menika, rombusa ugi mujudaken taneman herbal ingkang saged ngusadani sesakit anemia, njagi sel badan, ngatasi sakit ginjel, mbiyantu ngendhaleni tekanan rah, kadar gendhis ing salebeting rah sarta perkawis ingkang wonten gandeng cenengipun kaliyan kesarasan balung.
