TVRI YOGYAKARTA NEWS – HENDRY-ABDUL ROCHIM
Taneman zaitun ingkang asalipun saking laladan timur tengah kanyata ugi saged tuwuh subur ing indonesia. Taneman menika gadhah mupangat ageng ing donyaning kasarasan lan kecantikan, saengga gadhah kalodhangan peken ingkang tinarbuka.
Zaitun mujudaken setunggaling taneman ingkang aslinipun saking laladan Timur Tengah lan Afrika Selatan. Taneman menika gadhah mupangat ageng tumprap gesanging manungsa inggih menika dipun damel lisah zaitun. Lisah zaitun menika gadhah mupangat kangge kasarasan engga “kecantikan”. Sinaosa sanes mujudaken taneman asli indonesia, kanyata taneman menika ugi saged tuwuh kanthi subur ing indonesia. Ewa semanten kanyata dereng kathah warga ingkang mbudidaya taneman menika. Ing salebeting nanem wit zaitun menika kapetang tasih sisah. Ananging jalaran asalipun saking negari timur tengah lan afrika selatan, supados saged gesang kanthi sae ing indonesia, taneman zaitun kedah pikantuk paparan sunaring surya ingkang kathah kajawi menika suhu kedah ing sak nginggiling selangkung drajat selsius. Cara mbabar taneman zaitun inggih menika kanthi cara dipun cangkok. Sawetawis media tanem ingkang dipun nginak-aken inggih menika campuran saking pasir, brambut pantun sarta rabuk organik. Usaha ndamel winih zaitun menika tasih gadhah kalodhangan peken ingkang sae, lan panyuwunanipun inggil. Taneman zaitun ing wekdal menika nembe dipun dadosaken minagka taneman pasren kangge ngrengga setunggaling senthong. Kamangka menawi dipun budidaya kanthi estu temtu saged dados kalodangan usaha ingkang migunani lan murakabi. Menapa malih perangan ron-ipun ingkang endah ndadosaken sok sintena ingkang mirsani dados remen.
