TVRI YOGYAKARTA NEWS – WIDI-HARIF YUDA
Jahe abrit mujudaken satunggaling taneman bumbon ingkang ugi gadhah kasiat kangge ngusadani manekawerni sesakit. Taneman menika gampil tuwuh ing kebonan menapadene pot lan polybag.
Taneman jahe abrit saged tuwuh ing laladan tropis lan sub tropis, taneman menika asalipun saking india lan sumebar dhateng negari sanesipun, klebet Indonesia, ing indonesia, jahe abrit saget tuwuh kanthi sae ing laladan ingkang inggilipun watawis kalih atus ngantos nem atus meter saking seganten. Kajawi dipun tanem ing lahan konvensional, taneman jahe abrit menika saged dipun tanem ing setunggaling polibag. Menawi dipun tanem ing polibag media ingkang dipun ginaken inggih menika campuran siti, rabuk kandang sarta brambet. Rabuk ingkang dipun ginaken langkung sae menawi rabuk ingkangf sampun dipun olah, kangge ngirangi wontenipun ama uret. Ing sak lebeting nanem jahe abrit ingkang kedah dipun gatosaken inggih menika winih kedah sae, alus, ageng lan mboten kisut, saengga mboten gampil pejah nalika dipun dhedher. Pangrimatan taneman ingkang dipun tanem ing polibag inggih menika nyiram kanthi ajeg sampun ngantos medianipun garing. Kaajwi uret ama ingkang kedah dipun waspadani inggih menika uler ingkang asring nedha ronipun. Kawuningana bilih jahe abrit menika dipun mupangataken kangge bumbu mangsak menapadene jamu, jalaran jahe menika ngandhut lisah atsiri, jahe ingkang sampun garing, kandhutan lisah atsiri ngantos watawis tigang persen. Wondene kasiat tumrap kasarasan badan ing antawisipun ngiyataken liver, nikelaken daya tahan badan saking sesakit, lan ngirangi pegel linu. Pekenan jahe abrit, wekdal menika tasih tinarbuka, sawetawis, saben setunggal kilogram sampun ngancik 16.000 rupiah ing peken tradisional, wondene ing super market, utawi peken modern sampun ngancik 30.500 rupiah saben seklionipun.
