TVRI YOGYAKARTA NEWS – WIDI-HARIF YUDA
Pamirsa, kangge nyekapi kabetahan woh-wohan tumprap kulawarga, panjenengan saged nanem jeram sunkist. Taneman jeram sunkist menika gampil tuwuhipun lan wohipun nylandri, mboten gumantung kaliyan mangsa.
Vitamin C gadhah mupangat ingkang ageng kangge njagi daya tahaning badan. Sumber vitamin C wau asalipun saking woh-wohan, kadosta jeram, pelem, jambu lan sapanunggalanipun. Kangge nyekapi kabetahan vitamin wau kajawi saged tumbas ing pekenan, ugi saged budidaya piyambak. Salah setunggaling jinis taneman woh-wohan ingkang gampil dipun budidayaaken lan saged mawoh sapanjanging wekdal inggih menika jeram sunkis, Suharno saweneh warga saking kembang arum dono klerto turi sleman ngandaraken bilih piyambakipun sampun nanem jeram sunkis wiwit tigang tahun kapengker. Samenika taneman jeram sampun wiwit mawoh dados, ingkang kanyata mboten gumantung kaliyan mangsa, ananging mawoh nylandri sapanjanging wekdal, sinaosa tugimin namung gadhah kalih wit kemawon kanyata saged kangge nyekapi kabetahan kulawarganipun. Cara nanem jeram sun kis menika ugi kalebet gampil, sepisanan ndamel luwangan ingkang lebetipun setengah meter lan wiyar setengah meter. Saklajengipun dipun sukani rabuk kandhang ingkang sampun dados, lan dipun leremaken udakawis kalih minggu nembe dipun tanemi jeram. Sak dangunipun nanem jeram jinis menika kanyata mboten nemahi pepalang kalebet ama lan sesakit .kajawi dipun tanem ing siti, jeram sunkis ugi saged dipun tanem ing pot. Kajawi saged kangge ngirangi blanja woh-wohan, kanthi nanem piyambak saged ndamel lingkungan dados ijem.
