TVRI YOGYAKARTA NEWS – ABDUL ROCHIM
Kembang kol dumugi wedal sakmenika tasih mujudaken setunggaling komoditas olah tetanen ingkang panyuwunanipun inggil ing pekenan. Kejawi ngrimatipun gampil, regi kembang kol ugi kapetang ajeg.
Kadang tani ing laladan krinjing siluk bantul kathah ingkang mbudidaya taneman kembang kol minangka setunggaling komoditi pertanian ingkang dados piyandelipun. Hawa ing laladan menika pancen cocok kangge taneman janganan menika. Kangge nikelaken asiling produksi, kathah kadang tani ingkang mbudidaya kanthi cara tumpangsari, nanging saperangan ugi mbudidaya setunggal jinis taneman kemawon ing sabin kangge ngirit beya rabuk ingkang awis ing pekenan. Saweneh kadang tani ngandaraken bilih pangrimatan tumrap taneman janganan menika kapetang gampil. Ingkang kedah dipun gatosaken inggih perangan rabuk-ipun. Kejawi menika ugi kedah migatosaken jarak tanem, ingkang sae inggih menika seket dymygi sewidak centimeter ing saklebeting garis, sawetawis jarak baris setunggal lan sanesipun 60 – 70 centimeter. Mangsa tanem kembang kol menika benten-benten gumantung kaliyan jinisipun. Ananging radin-radin ngancik umur 55 dumugi 60 dinten wiwit mangsa tanem. Setunggaling ama ingkang ngrebasa taneman menika inggih kadosta kepik ingkang njalari ronipun bolong. Nanging menika saged dipun awekani kanthi metani mbaka setunggal. Menawi wonten taneman kembang kol ingkang risak saged dipun sulam taneman ingkang enggal. Karesikaning lahan ugi kedah dipun gatosaken kanthi cara mbubut suket ing sakiwa tengenipun taneman. Ing tataran kadang tani, kembang kol sakmenika dipun sade gangsal ewu rupiah.
