TVRI YOGYAKARTA NEWS – WIDI-ABDUL ROCHIM
Wayang mujudaken salah setunggaling media ingkang irit lan murakabi kangge nepangaken isen-isening alam donya tumrap lare. Wayang kancil, salah setunggaling jinis wayang kangge mbabar menika.
Wayang utawi ringgit ingkang ngrembaka ing nuswantara pancen werni-werni jinisipun, sedaya gadhah ciri mirunggan piyambak-piyambak. Salah setungalipun inggih menika wayang kancil ingkang dipun ripta dening swargi lenjar ing tahun sewu sangang atus sewidakan. Kawuningana, wayang kancil menika saestunipun mujudaken jamboran ing antawisipun seni teater lan seni tradisi lisan ingkang nengenaken perkawis basa ingkang dipun pocapaken utawi bahasa tutur kanti dipun iringi dening ungeling gamelan, wayang kancil ingkang wujudipun arupi tironipun sato kewan, tetuwuhan, lan pak tani, dumugi wekdal samenika taksih dipun dadosaken srana wulang-wuruk tumrap lare. Wayang ingkang nyariyosaken gesangipun sato kewan ing wana menika ugi ngemu piwulang ingkang prasaja, ing antawisipun tresna mring alam donya, njagi resikipun laladan, lan tresna tumrap sesami, ingkang tundhonipun nedahaken bilih sinten ingkang nanem kasaenan, ugi badhe ngundhuh kasaenan, mekaten ugi sakwangsulipun. Salah setunghgaling carios ingkang ngemot piwucala inggih menika kancil nyolong timun.
Raos tresna tumrap lingkungan saget dipun purwakani kanthi raos tresna dhateng seni lan budaya.
