TVRI YOGYAKARTA NEWS – HENDRY
Salah setunggaling komoditi olah tetanen ingkang kathah dipun budidaya dening kadang tani pesisir inggih menika lombok. Nanging gandeng kaliyan kawontenan ing sakcelaking pesisir mila kadang tani kedah migatosaken babagan kabetahan rabukipun.
Kados mekaten menika taneman lombok rawit ingkang dipun budidaya dening saweneh kadang tani ing laladan pesisir Bantul menika. Sampun sawetawis wedkal menika piyambakipun nindaaken budidaya taneman lombok, menapa malih pengaosipun ing pekenan sae. Sanadyan kadang tani kedah ngadhepi kathahipun sesakit lombok, ananging kemawon kanyata taneman menika taksih dados piyandelipun kadang tani. Kados ingkang dipun tindaaken dening saweneh kadang tani menika, taneman lombok gadahanipun dipun damel bedengan ingkang inggil kangge ngawekani toya ingkang ngembeng. Kados ingkang kauwningan bilih menawi kekathahen toya saged nuwuhaken manekawerni sesakit lombok. Kejawi kabetahan rabuk ingkang kedah dipun gatosaken, sitinipun ugi kedah dipun garap rumiyin kanthi dipun traktor. Jinising taneman lombok ingkang dipun pilih inggih menika lombok ori ingkang nggadahi manekawerni kelangkungan ing antawisipun tahan saking ama lan sesakit, ukuranipun ageng lan produktifitasipun inggil. Kadang tani ngajab semangke nalika panen asilipun sae kangge nambah wulu wetu keluwarga.
