TVRI YOGYAKARTA NEWS – WIDI-YUDA
Para pamirsa, salah satunggaling cara supados ubenging ekonomi ing saklebeting budidaya ulam nila langkung cepet, inggih menika ngetrepaken cara budidaya segmentasi.
Nindaken usaha budidaya ulam gurameh kanthi cara segmenytasi menika mujudaken setunggaling cara ingkang sampun dipun-tindaken dening panti, saweneh warga saking Padusunan Dukuh, Wijimulyo, Nanggulan Kulonprogo. Cara usaha budidaya ulam nila segmentasi inggih menika tansah misah-misahaken ulam menawi sampun ngancik ing setunggaling ukuran ingkang sampun dipun temtokaken. Kanthi cara ingkang mekaten menika kadang tani saged nemtokaken wekdal ing salebeting badhe nyade usaha budidayanipun ingkang laras kaliyan panyuwuanan peken. Kadang tani saged nyade kanthi dipun pilah-pilah ukurananipun wiwit kalih senti, nem senti, menapadene ingkang sampun siyaga dipun konsumsi. Kanthi cara menika pembudidaya ingkang badhe tumbas kantun milih jumbuh kaliyan kekajenganipun, kaluwihan sanesipun nindaken usaha budidaya ulam cara segmentasi inggih menika tataran pejahing ulam langkung andhap, tuwuhing ulam cepet sarta paniti priksa ingkang langkung permati jalaran katindaken ing saben wekdal saengga wontenipun ama lan sesakit saged enggal-enggal dipun kendhaleni. Saben wulanipun panti saged nyade winih ulam nila engga nem atusan ewu iji, dhumateng kadang tani ing laladan Kulonprogo, Bantul sarta Sleman.
