TVRI YOGYAKARTA NEWS – WIDI-YUDA
Para pamirsa, menawi panjenengan badhe nindaken preen nataru, panjenengan saged ngendhangi setunggaling dusun ing laladan kulonprogo ingkang nawisaken manekawerni wisata. Kaajwi ningali sesawangan alam, para pelancong ugi saged sinau mbatik.
Segajih mujudaken salah setunggaling nama dusun ingkang dumunung ing Kalurahan Hargotirto, Kapanewon Kokap Kulonprogo. Laladanipun gadhah potensi sesawangan alam ingkang endah tur edi peni jalaran dumunung ing pareden menoreh. Sumber Daya Alam kala wau dening warga masyarakat dipun optimalaken kanthi mekaripun jujugan wisata ingkang kaparingan nama segajih life in and education rikala tahun kalih ewu wolulas kapengker, jujugan wisata segajih life in and education menika beda kaliyan jujugan-jujugan sanes ingkang wonten. Menawi jujugan sanesipun nawisaken kendahaning alam, ananging ing papan menika kajawi nawisaken kaendahaning alam, ugi sinengkuyung potensi ingkang wonten ing dusun menika wiwit saking kuliner, kesenian engga wontenipun papan kangge out bond ingkang jangkep. Ing jujugan wisata segajih life in and education menika para tamu ugi saged nyipeng ing papan padununganipun warga ingkang gunggunipun ngancik sanga likur griya, ingkang gadhah standart nasional menapadene internasional. Suyanto dukuh segajih ngandraken bilih kanthi mekaripun jujugan wisata menika kanyata ugi saged nambah wulu wetuning warga masyarakat langkung-langkung nalika dumados pageblug Covid-19.
Segajih life in and education mujudaken papan wisata kanthi pengalaman ingkang mirunggan mboten namung kaendahan padreden ananging ugi pengalaman ing seni lan budaya, ngiras pantes maunggal ing satengahing berayan masyarakat. Ing papan menika para pelancong saged sinau ing alam lanning sak jawining pawiyatan, saengga saged amahami karakter budaya lokal.
