TVRI YOGYAKARTA NEWS – WIDI-HARIF YUDA
Minagka punjering agami islam Kraton Ngayogyakarta kathah mbangun masjid minangka kangge syiar agami. Salah setunggalipun inggih menika mesjid pathok negari plasa kuning ingkang dumugi wekdal samenika tasih kajagi cakrik aslinipun, kalebet blumbang ingkang ngupengi mesjid.
Masjid patok negoro plosokuning dumunung ing Dusun Plosokuning Minomartani Ngaglik Sleman, mapan ing sak nginggiling siti kangungan Kraton Ngayogyakarta Hadiningrat, kanthi wiyar kalih ewu gangsal atus meter pesagi. Masjid dipun bangun rikala jumenengipun ngarsa dalem Sri Sultan Hamengku Buwono ingkang sepisan, sapurnaning pembangunan masjid agung ngayogyakarta saengga cakrik utawi gagrak arsitektur bangunan meh sami. Ciri mirunggan minangka mesjid kagungan dalem ingkang dumugi sak menika tasih dipun jagi aslinipun inggih menika wontenipun blumbang ingkang dipun bangun ngubengi masjid sarta wontenipun wit sawo kecik ing sakiwatengening masjid. Masjid patok negari plosokuning dipun sangga saka guru cacah sekawan ing bangunan utami lan cacah wolu sanesipun ingkang dipun mupangataken kangge nyanggi bangunan serambi masjid, kajawi menika undhak-undhakan ingkang wonten, cacahipun tiga ingkang mralambangaken iman, islam, lan ihsan. Masjid patok negori ploso kuning ugi gadhah senthong pawestren ing sisih kiwa lan tengening bangunan utami. Bab ingkang mekaten menika gadhah makna bilih kalenggahaning pawestri lan kakung mekaten sami, ingkang wusananipun karipta setunggaling raos tepasalira dhumateng sesami. Ciri mirunggan sanesipun inggih menika para iman masjid pathok negara mujudaken tiyang ingkang dipun pilih langsung dening pihak kraton ngayogyakarta. Gayut kaliyan umuripun mesjid ingkang sampun dangu dipun bangun, mesjid menika ugi sampun dipun mulyaaken utawi dipun pugar, sinaosa mekaten tetep dipun jagi cakrik aslinipun. Masjid pathok negari ploso kuning dening kementerian kebudayaan dan pariwisata indonesia dipun dadosaken bangunan cagar budaya. Masjid patok negori engga sepriki tasih kajagi kanthi sae lan dados punjering masyarakat ing salebeting nikelaken iman lan takwa dhumateng alloh susbhalllohu wataala.
