TVRI YOGYAKARTA NEWS – JATMIKO HADI
Sawetawis seniman ing Kabupaten Kulonprogo kasil jamboraken tigang kesenian tradisional inggih menika krumpyung, lengger sarta gejog lesung, dados setunggal pasugatan ingkang endah lan kasil ndudut kawigatosaning warga masyarakat.
Kados mekaten menika pasugatan 3 kesenian tradisional krumpyung, lengger sarta gejog lesung ingkang dipun gelar sesarengan dining Dinas Pariwisata Kabupaten Kulonprogo. Ing pagelaran menika 4 pambeksa lengger utawi tayub sami nyegahaken kapigelanipun mbeksa ing sak ngajengipun para pamriksa jangkep ginakaken sampur utawi slendang. Para pambeksa menika dipun iringi gamelan gejog lesung ingkang piranti utaminipun ginakaken lesung utawi alu. Wiramaning gejog lesung langkung narik kawigatosanipun para warga ingkang mirsani pasugatan menika, awit dipun jamboraken kaliyan kesenian krumpyung, ingkang piranti utaminipun ghinakaken angklung, saron lan kendang ingkang kadamel saking deling ingkang mujudaken cirimirungganipun kesenian krumpyung. Pagelaran kesneian menika langkung regeng awit wontenipun sinden ingkang nembang jawi kanthi sae. Pagelaran seni ingkang jamboraken tigang kesenian tradisional menika kanyata pikantuk kawigatosan ingkang inggil saking warganing masyarakat. Kacihna saking katahing warga ingkang mirsani pagelaran menika. Dinas pariwisata kabupaten kulonprogo piyambak badhe ngadani pagelaran ingkang kados menkaten menika, kangge salah setunggaling kupiya nglestantunaken seni lan kesenian tradisional supados mboten ical kagerus lampahing jaman.
