TVRI YOGYAKARTA NEWS – WIDI-YUDHA
Pamirsa, ulam jinis lokal kadosta uceng lan gabus menawi dipun mekaraken kanyata gadhah bobot ekonomi ingkang inggil.
Gungunging produksi ulam ing laladan Kabupaten Sleman saben tahunipun ngancik wolung ewu ton langkung. Ulam ingkang dipun asilaken dening kadang tani antwisipun ulam lele, gurameh, bawal lan nila. Sinaosa gunggunging ulam ingkang dipun asilaken ngancik wolung ewu ton saben tahunipun ewasemanten dereng saged nyekapi kabetahan ulam ing diy saengga budidaya ulam mekaten tasih gahah kalodhangan peken ingkang sae. Saking gunggung wau sleman masok sewidak persen kabetahan ulam ing tataran DIY. Kajawi jinis ulam wau, sakjatosipun laladan Kabupaten Sleman ugi gadhah sumber daya ulam jinis lokal ingkang ugi gadhah bobot ekonomi inggil. Salah setunggalipun inggih menika ulam wader ingkang kathah gesang ing sadengeh lepen-lepen ing laladan Sleman. Jinis ulam menika gadhah bobot ekonomi ingkang inggil, saben sekilonipun ngancik kawan dasa ewu rupiyah. Kajawi wader jinis ulam local ingkang gadhah pangajeng-ajeng ingkang sae inggih menika ulam uceng. Supados samangkenipun winih ulam jinis menika cumawis dinas perikanan diy nindaken domestikasi ulam ing cangkringan. Kanthi cumawising winih ulam menika ing pangangkah saged dipun ingah dening kadang tani ing blumbang saengga, saged nikelaken karaharjaning kadang tani ngiras pantes nyengkuyung program gerakan makan ikan utawi gemari ing Sleman. Kawuningana bilih gungguning konsumsi ulam warga masyarakat DIY ing wekdal samenika tigang dasa kalih kilogram saben tiyang saben tahunipun sawetawis ing tataran nasional ngancik kawan dasanan kilogram saben tiyang saben tahunipun.
