TVRI YOGYAKARTA NEWS – SETYA BUDI
Kupiya nglestantunaken Tlaga Ngurik Gunungkidul tansah katindakaken dining warganing masyarakat kanthi nanem manekawerni taneman ingkang saget nyimpen toya. Saengga telaga menika tansah kajagi lan paring mupangat tumrap warga ing sak kiwatengenipun.
Katahipun tlaga ing laladan Kabupaten Gunungkidul ingkang sami asat nalika mlebet ing mangsa ketiga, ndudut kawigatosanipun sawetawis warga masyarakat. Manekawerni kupiya tansah dipun tindakaken supados tlaga ingkang wonten ing laladan Kabupaten Gunungkidul saget dipun mupangataken dining warga. Kados ingkang dipun tindakaken dining dasanan warga Padukuhan Waru, Girisekar, Panggang Gunungkidul, ingkang nanem manekawerni taneman langka ingkang saget nyimpen toya ing Tlaga Ngurik saengga debit toya tlaga tansah kajagi. Manekawerni jinis taneman ingkang dipun tanem ing Tlaga Ngurik menika antawisipun taneman Joho, Lerak, Nogosari, Panggang, Kendal engga asem jawa, ingkang dipun tanem ing sak pinggiring tlaga ngurik. Kajawi kangge ngiket toya, wontenipun krida nanem taneman langka menika dipun ajab saget ndandosi lapisan ngandap tlaga ingkang sampun risak. Dukuh Waru Harto Husodo ngajab, taneman ingkang dipun tanem menika saget tuwuh kanthi subur, lan paring mupangat dumateng warga masyarakat ing sak kiwatengenipun tlaga ngurik.
Wontenipun manekawerni taneman langka menika ugi minangka srana pasinaon dumateng generasi muda ingkang dereng katah mangertosi wontenipun taneman langka menika.
