TVRI YOGYAKARTA NEWS – JATMIKO HADI
Dasanan hektar lahan olah tetanen ing laladan Bulak Sri Kayangan Sentolo Kulonprogo sampun mlebet ing mangsa tanem. Ananging katahipun lahan ingkang kembong toya awit kapangaribawa jawah, ndamel kadang tani kewetan anggenipun ndamel pinihan.
Mlebet ing pungkasaning tahun 2024 menika, sawetawis lahan olah tetanen ing laladan Kabupaten Kulonprogo sampun mlebet ing mangsa tanem. Salah setunggalipun inggih menika ing laladan Bulak Sri Kayangan Sentolo Kulonprogo. Ing laladan menika sabagean sabin kawontenanipun ijo royo–royo dipun tanemi pantun. Ananging sawetawis laladan kawonbtenanipun tasih kembong toya. Bab menika mangaribawani kadang tani kesisahan anggenipun ndamel pinihan lan pados wininh pantun ingkang siyaga dipun tanem. Katah winih pantun ingkang sami kembong toya ingkang pungkasanipun lajeng pejah. Salah saweneh kadang tani Sarjoko ngandaraken, awit saking kawontenan menika piyambakipun kedah ndamel pinihan malih ing lahan gadahanipun kadang tani sanesipun ingkang mapan ing sak jawining laladan bulak kayangan . Ing mangsa tanem pantun wekdal menika piyambakipun nanem pantun jinis inpari 47 ingkang dipun pitados gadahi sawetawis kalangkungan, antawisipun kiyat ngadepi angin, tahan saking kembong toya engga tahan saking ngrebasananing ama lan sesakit kadasta wereng lan bususk batang.
Kawuningana bilih laladan bulak sri kayangan sentolo kulonprogo mujudaken lahan olah tetanen ingkang mapan ing sak ngandaping saluran irigasi, saengga menawi kawonten jawah, toya irigasi luber ing lahan pesabinan saengga ndamel sabin kembomng toya.
