TVRI YOGYAKARTA NEWS – JATMIKO HADI
Kreteg deling ing Dusun Kemasan Sidomulyo Pengasih Kulonprogo kintir kinging bena lepen serang. Kamangka kreteg menika dipun mupangataken kadang tani kangge tumuju sabin lan dipun bangun kanthi swadaya.
Kados mekaten menika kawontenanipun kreteg deling sak sampunipun katrajang bena lepen serang ing Dusun Kemasan Sidomulyo Pengasih Kulonprogo. Kreteg deling kanthi panjang 15 meter, wiyar setungal setengah meter lan inggil 3 setengah meter menika kintir lan mboten sisa. Maryono salah saweneh warga ingkang ugi mujudaken Ketua RT 8 Kemasan ngandaraken, bilih kreteg deling menika kintir nalika jawah deres sawetawis dinten kapangker lan dumados bena ing lepen serang. Kamangka kreteg deling menika mujudaken swadaya saking warga masyarakat lan nembe purna dipun bangun setunggal minggu pungkasan. Warga sengaja ndamel kreteg deling menika kangge ngampilaken kadang tani nalika tumuju ing sabin lan mbeta asil panen. Amargi menawi mboten wonten kreteg mneika, kadang tani kedah nyebrang lepen serang utawi nglangkung mergi ingkang tebihipun langkung saking 2 kilometer.
Awit kawontenan menika warga badhe ndamel kreteg deling malih ingkang langkung kiyat. Warga nyuwun dumateng pemerintah lan bebadan ingkang kawogan paring bebanton arupi bronjong lan material kangge ndamel pondasi, supados samangkenipun kreteg ingkang dipun bangun saget langkung kiyat.
