TVRI YOGYAKARTA NEWS – WIDI-YUDHA
Para pamirsa, dawet sambel unjukan mirunggan saking laladan kulonprogo, nawisaken sensasi raos ingkang unik ingkang manungglaken pedes lan sari pathi aren ingkang lembut, menawi pun unjuk. Dawet samebl menika nedahaken salah setunggaling banda bandhu kuliner nuswantara.
Dawet mujudaken srtunggaling unjukan ingkang kathah dipun sade ing laladan Ngayogyakarta, padatanipun dipun damel saking cendol, irisan nangka, santen, ingkang dipun campur kaliyan juruh gendhis jawi. Ananging ing laladan kabupaten kulonprogo pasipun ing Padusnan Banyunganti, Jatimulyo, Girimulyo, wonten setunggaling unjukan mirunggan arupi dawet ingkang dipun campur mawi sambel. Dawet menika benten kaliyan dawet sanesipun jalaran dipun tambah sambel, saengga karipta setunggaling raos ingkang gurih, manis, lan pedes ing setunggaling mangkok. Wande dawet pedes meka mapan ing sak pinggiring mergi tumuju wisata sungai mudal, lan kaloka minangka dawet pedes Yu Sarah, sor ringin. Menawi dipun pirsani sakjatosipun dawet menika meh sami kaliyan dhawet sanesipun, ananging dawet menika dipun ladosaken ngginaken juruh saking nira klapa, sarta sambel. Cendol dawetipun dipun damel saking pathi wit aren, sawetawis sambelipun dipun damel saking campuran brambang goreng, bawang, lombok sarta klapa parut. Sedaya bahan ingkang sampun cumawis kala wau dipun campur lan dipun uleg engga nyawiji. Anggenipun nyugataaken, cendol dipun tambah sambelipun lan ingkang mboten saged dipun supekaken inggih menika juruh saking nira. Yu Sarah nindaken usaha ndamel dawet pedes menika sampun wiwit puluhan tahun kapengker engga sepriki, lan mujudaken resep ingkang dipun turunaken dening eyangipun, para lengganan mboten namung saking sakiwatengening kecamatan giri purwa kemawon, ananging ugi wonten saking sak jawining laladan. Kepara menawi ngepasi preen dagnaganipun menika dipun borong dening warga ingkang sami mudik. Psetunggal mangkok dawet pedes pengaosipun sekawan ewu rupiyah, lan saben dintenipun saged nelasaken kalih atusan mangkok. Wontenipun dawet sambel menika dados bukti bandha bandhuning kuliner nuswantara ingkang tasih dipun lestantunaken masyarakat kulonprogo saking generasi tumuju generasi candhakipun.
