TVRI YOGYAKARTA NEWS – YUDHA
Ing perenging redi merapi kanyata wonten satunggaling potensi wisata alam ingkang dereng katah dipun mangertosi dining masyarakat, inggih menika wana Pinus Ngandong.
Ing laladan Ngayogyakarta katah dipun prangguli wana pinus ingkang sak menika dipun mekaraken dados salah satunggaling jujugan wisata pinunjul. Mboten namung ing laladan Kabupaten Bantul kemawon, ananging ing laladan Kabupaten Sleman ugi wonten wana pinus ingkang nawisaken kaendahaning alam khas redi merapi. Wana kasebat inggih menika wana pinus ngandong, ingkang mapan ing Dusun Ngandong Kalurahan Girikerto Kapanewon Turi. Wana ingkang mapan ing perenging redi merapi menika, dereng katah dipun datengi dining wisatawan kadosdene wana pinus ingkang wonten ing Kabupaten Bantul. Menawi bade tumuju ing wana ngandong menika, para wisatawan kedah nglangkungi margi ingkang alit lan ing sak kiwatengenipun mujudaken wana. Ananging wisatawan mboten perlu waskuwatos, sinaosa merginipun alit ananging tetumpakan kadasta mobil saget dumugi ing wana sembung menika. Kajawi nawisaken kaendahaning alam, ing wana pinus ngandong menika para wisatawan saget ngraosaken hawa ingkang seger khas hawa pareden. Kajawi saget kangge ngenggar–enggar penggalih, ing wana pinus ngandong menika wisatawan ugi saget nindakaken manekawerni krida ing antawisipun camping, outbound lan krida sanesipun. Wana ingkang mapan ing tapel wates antawisipun kalurahan girikerto lan taman nasional gunung merapi menika, ugi sampun dipun jangkepi wontenipun dolanan lare lan bandulan. Miterat warga, ing dinten–dinten tinamtu lan dinten preen, wana pinus ngandong menika katah dipun datengi dining para klempakan pit–pitan utawi ingkang kaloka lan asring dipun sebat goweser. Mlebet ing wana pinus ngandong menika tasih lelahanan kemawon. Warga ngajab wana pinus ngandong menika saget dipun klola langkung sae malih, saengga saget dipun dadosaken salah setunggaling jujugan wisata alam ing perenging redi merapi, ingkang trinjongipun saget ningkataken ekonomining warga masyarakat ing sak kiwa tengenipun wana Pinus Ngandong.
