TVRI YOGYAKARTA NEWS – SETYA BUDI
Pesisir siung ingkang mapan wonten ing Kapanewon Tepus, Gunungkidul, mujudaken setunggaling pilihan jujugan wisata pesisir ing Ngayogyakarta. Pesisir ingkang mlebet wonten ing kawasan Geopark Gunungsewu UNESCO menika nawisaken kaendahan alam ingkang edi-peni.
Kathah jujugan wisata ingkang wonten ing laladan Gunungkidul ingkang saged datengi minangka kangge ngenggar-enggar penggalih mliginipun nalika ing wekdal gantosing tahun mangkeh. Salah setunggalipun inggih meinka pesisir siung ingkang mapan wonten ing laladan Kalurahan Purwodadi, Kapanewon Tepus, Gunungkidul. Pesisir siung nawisaken kaendahan alam ingkang edi peni. Kawuningana bilih pesisir siung lan ugi pesisir Wediombo, mlebet wonten ing kawasan Geopark Gunungsewu ingkang sampun dipun tetepaken dening bebadan donya UNESCO. Ing pesisir meika wistawan saged mirsani kaendahan alam pesisir pasir pethak lan ombyaking seganten sarta pereng sela ingkang endah. Kanthi sesawangan alam menika wau mila mboten maiben bilih wisatawan saged nelasaken wekdal ingkang dangu wonten ing pesisir menika. Ewa semanten wisatawan ugi dipun ajab langkung nikelaken kawaspadanipun gayut kaliyan katetepan saking bebadan kawogan awit saking ombyaking seganten ingkang ageng sawanci-wanci. Dipun dugi gunggunging wisatawan ingkang ngendangi papan menika tansaya kathah nyelaki wekdal gantosing tahun.
