TVRI YOGYAKARTA NEWS – JATMIKO HADI
Jawah deres ingkang dumados ing pungkasaning wekdal menika, njalari atusan hektar lahan pesabinan ing laladan Bulak Sri Kayangan Sentolo Kulonprogo kembong toya. Kawontenan menika ndamel saperangan taneman pantun gadhahanipun kadang tani risak lan kadugi badhe gagal tanem.
Kados mekaten menika kawontenaning lahan pesabinan ingkang dumunung ing bulak sri kayangan sentolo, kulonprogo ingkang katrajang bena toya jawah. Sinaosa sampun wiwit surut ananging ugi tasih wonten toya ingkang kembong. Kawontenan menika njalari saperangan taneman pantun ingkang umuripun nembe seminggunan risak lan gagal tanem. Suradi warga Dusun Panjul Srikayangan, mratelaken bilih lahan gadhahanipun ingkang wiyaripun kalih ewu meter pesagi tasih kembong toya, kamangka piyambakipun nembe kemawon nanem winih pantun semingunan kapengker. Suradi kuwatos taneman pantunipun risak lan kedah ngambali tanem malih. Bena ingkang dumados menika ugi ndayani saperangan lahanipun mboten saged dipun garap, saengga ndamel munduring mansga tanem. Kadang tani namung saged pasrah sinambi nengga bena surut.
Kadang tani nyebataken bilih bena ingkang nrajang ing lahan peabinan menika sampun asring dumados, ananging kedadosan tahun menika langkung awrat, kapandingaken kaliyan pucuking mansga jawah tahun kapengker. Kadang tani ngajab bebandan ingkang kawogan saged enggal-enggal pados cara supados bena mboten dumados malih ing laladan menika.
